ఎండమాయి
చెరువు కట్ట
చింత చెట్టు
ఊరిమీది ముచ్చట్లు
నక్రాలువడి గొప్పలు
కడుపువట్ట నవ్వులు
నాకు ఇంకా యాదికే !
నడూర్ల సందడి
కోమటొల్ల యాకిలి
పొక్కిలి జేసి ఆటలు
లచ్చమ్మ ఒర్లుడు
ఈడంటే ఈడంటూ
ఒకనిమీద ఒకడు
నాకు ఇంకా యాదికే !
చిత్తల్కాయలదెమ్పి
ఎండిన కంపలదెచ్చి
కాలవెట్టి పొగలతోని నోట్లవెట్టి
మిగిల్నయన్ని పంచుకువొంగ
చేల్లెన్లు మురుశిన్రు
మాయన్న దెచ్చె ఇన్నిగనమని
నాకు ఇంకా యాదికే !
అగ్గికురిసే యాల
అందరం కప్పలమే
ఈరంబాయి మోట మీద
దొరకవట్టుడు ఆటలో
ఈడ మునిగి ఆడ
ఆడ మునిగి ఈడ
నాకు ఇంకా యాదికే !
కిరాయి సైకిలున్నోడు
దమ్మువట్టినంక యియ్యాలె
అప్పట్దాక మొక్కులే
యాష్టకొచ్చిన్దాక తొక్కాలె
నాకు ఇంకా యాదికే !
బూషి మొఖాన దువ్వని జుట్టు
శీమిడి మీసాల నవ్వువోని తనం
చెడ్డి గుంజి మొలతాడు ఎక్కించి
మోకాళ్ళ పుండు కార్తున్న సీము
గుండీల్వోయి కాంటలే గతి
చేత్లవడితి ఇన్ని పుస్తకాలు
తెగిన చెపుల్నిసరిజేస్కొని
ఒరాల మీద నడుసుల్లు
నాకు ఇంకా యాదికే !
Krishna Mani
No comments:
Post a Comment