మొగులుమీదినుండి దిగొచ్చిన
సందమామలెక్కున్నవు పటేలా ఈ తెల్ల బట్టలల్ల
ఏడ లేడు నీయసొంటి దొర
నడుస్తే పెద్దేనుగులు పండికోక్కోలె ఉరుకుతయి
సందులెంట
బాంచెన్ దొర నీ కాళ్ళు మొక్కుత !
మాలెస పొద్దుకు ముందే
మీ ఇంట్ల తల దించెటోళ్ళం పటేల
మాతోలు పీకి చెప్పులు కుట్టిస్తం దొర
షేరు గుంజాలకు గులాంలము పటేల
పేరుకు మల్లయ్యను మీకాడ మాదిగి మల్లిగాన్ని దొర !
కడుపుకి కష్టం దప్ప ఇంకేమిలే మాదొర
మీ సుఖాలను జూసుడే మా సుఖం పటేలా !
దేవునివి పటేలా
నీ బండి సప్పుడికి చెప్పులిడిషి
పెయ్యోన్చుతం పటేలా !
నీకిమ్పైతే మా ఇంట్లోళ్ళు పక్క పాన్పులే దొర
కన్నేర్రజేస్తే కాటికే పోతం పటేలా
ఒగనికష్టం ఇంకోగరం సేప్పుకుబతుకుతున్నం దొర
పగాని ముచ్చటలేని పసిపోరాలం పటేలా !
అని పల్వరించే మా తాత నిద్రమత్తుల
మరువని మచ్చలు యాదికొచ్చి కుములుతున్నడు
ఆ రోజుల్ల నేనుంటే తేజాబ్ కత్తినైతుంటి !
కృష్ణ మణి I