ఆకలి పిల్లి

ఆకలి పిల్లి

_________________ క్రృష్ణ మణి

శత్రువునే

నీ నిండు ఛాందాసానికి

రేయి పగలును వేరుగా చూసి

చీకట్లో చిందేసే నీ అరాచకానికి

శత్రువునే

పది కూడా నిండని

పసిమొగ్గలను చిదిమేసే నీ మొండి కత్తికి

కోరికను నిమురుతూ వాంచగా చూసే నీ కళ్ళకు

శత్రువునే

మనసును వదిలి

శరీరానికి ముసుగేసి

దుఃఖాన్ని సుఖమనే ఎక్కిరింపుకు

శత్రువునే

తలాక్ అని

నీ ఆధిపత్యాన్ని

గర్వంగా చాటుకునే అహంకారానికి

శత్రువునే

ఏలేటోడికి ఎందరైనా అనే

నీ వంకర నొసలుకు

నీ పిల్లలను నువ్వే మింగే పిల్లి ఆకలికి

శత్రువునే

మొగనితో పాటే కాలుమని తోసే

నీ బలిసిన చేతులకు

అచారం పేరుతో ఆకలికి మాడ్చి చంపే

నీ కసాయి గుండెకు

ఏమి చెస్తావురా పిచ్చి మనిషి

నలుగురు పిచ్చొళ్ళను పోగేసి కరవడం తప్ప

నీ అహం దిగే వరకు

అగ్గి రాజెస్తెనే ఉంటా

కట్టె కాలేవరకు

అది నీదో లేక నాదో

క్రృష్ణ మణి

దారి

దారి

_______________కృష్ణ మణి

మౌనం ప్రశాంతతకు నిదర్శనం

అని తెలుసు కాని

మెల్లిగా అర్ధమౌతుంది

ఆవేశాన్ని దిగమింగి సాగుతున్న ఆలోచనని

ఎగసే అలకు సూచనని

మరుగుతున్న నెత్తురు సెగని

జరిగే పోరుకు సిద్దమని

మౌనం పెకిలితే

ఉద్భవించే శబ్దాన్ని

కలియబడే ఉగ్రరూపాన్ని

తట్టుకొనే ధైర్యం ఎక్కడిది ?

నిట్టూర్పుల వలలోంచి జారి

సంద్రంలో దూకిన ఉద్వేగాన్ని ఆపే శక్తి ఎక్కడిది

మిత్రమా

చూడు నిదానంగా నీలోకి

ఎక్కడో ఆరిన కసిని

ఒక్కసారి కుదిపిచూడు

ఏమంటుందో

ఇంకెంతకాలం ఇలా అని

తడబడుతున్న నీ అడుగులను నిలదీస్తున్నది

అలా కాదు ఇలా అని

దారి కనిపించేలా

నీలో దిశా నిర్దేశం జరుగుతుంది

విన్నావా

కనిపించిందా

మరి పదా ఆ దారిలో

నీకు నువ్వే గురువై

గురివైపు పరుగుపెట్టు

నలుగురు నడిచే దారికి

నువ్వే దారివై

కృష్ణ మణి

కడుపుగాసం

కడుపుగాసం

_________________కృష్ణ మణి

ఏమున్నది బయ్యా

కడుపుకాలి ఒకడుంటే

పెయ్యిబరువెక్కి

నోరు గులాగులాంటోడు ఇంకొకడు

ఇత్నం కొనవోతే

తక్వ ధర ఎక్వ లాభమని

గుంజి గుంజి చేత్లవెడతరు

ఏమ్మున్నది బయ్యా

నాగలి సాగక తిప్పలైతే

ట్రాక్టర్ సౌండుకు

గుడ్లు తెలేశినై ఎడ్లు

ఏమ్మున్నది బయ్యా

తడందక ఎండిపోతే ఒకపారి

నీళ్లేక్కువై మురుగవట్టే ఒకపారి    

ఏమ్మున్నది బయ్యా

శేనుకు మందుగోడుతుంటే

కారాపి నక్షలు సూస్కుంటా

నొసల్తోని ఎక్కిరిస్తరు

ఏమ్మున్నది బయ్యా

చేశేదేమి లేక

నాగలి తాళ్ళు

చెట్టుకు యాలాడవట్టే

ఏమ్మున్నది బయ్యా

ఇంకేమిలేదు బయ్యా

ఉన్నదమ్ముకొని

ఊరవతల జీతముండాలే

పొరల మంచి చెడ్డ మరిశి

కడుపుగాసం బతుకులాయే

ఏమున్నది బయ్యా

ఇంకేమున్నది

కృష్ణ మణి   

చిట్టి మనసు

చిట్టి మనసు

_________________ క్రిష్ణ మణి

ఇటుక ఇటుక మధ్యలో

మనసుని పెట్టి కట్టాను గూడును

ఇంటి కప్పును గడ్డితో కప్పుతూ

చలికి పెట్టుకున్న గుల్వణ్ ను సరి చేసుకుంటూ

నా ఇల్లును నామొహంలా చూసుకొని మురిసిపోయాను

కొండకోనల్లో

పేలుళ్ళకు బెదరలేదు

సంకలోంచి బుల్లెట్ వెళ్ళినా వణకలేదు

ఆర్డర్ వచ్చి

రొడ్డునేసింది నన్ను

బట్టలూ దుప్పట్లు

ఎన్ని మూటగట్టినా

నా గుండెలో బరవు ఎవరు మోస్తారు

మూలదాటి తిరిగిచూస్తే అగుపించింది

కన్నీరులో నా గూడు మునుగుతుంది

సైనికుల బూట్ల చప్పుళ్లకే తల్లడిల్లింది

మరి తూటాల వర్షంలో తడిస్తే ఏమవుతుందో

ఇప్పుడు ఏది నా ఊరు

ఏది నా గొడుగు

ఈ మంట చల్లరే సరికి

నా కట్టె బూడిదౌతుందేమో

కనీసం

నా పిల్లలైనా చూస్తారో లేదో

ఆ చిట్టి మబసుని

క్రిష్ణ మణి

వికారం

వికారం

_______________కృష్ణ మణి

మనసు నీడన ఒక వెలుగు

పసిపాపలా కునుకుపాట్లు  

ఎవరో దాడి చేస్తారని

వణికి వణికి ఊగుతుంది

మనిషి బయటికి ఎంత గంభీరంగా ఉన్నా

లోలోన భయానికి పైన మేకపోతే !

చుట్టుపక్కల ఎందరు కాపలా ఉన్నా

అర్దరాత్రి తలుపు తట్టే గుండేనొప్పికి

శ్వాస నింపడం అవుతుందా వారికి

ఎదురుగ వస్తున్నా మనిషి

సూటిగా నీకై చూస్తే

తడబాటు

నీలో మంచి ఉందో

లేక బురద ఉందో

ఒక్కసారి చూసుకో

ఆ అద్దంలో చూసుకొని చెప్పు నిజాయతిగా

  

ఎందుకు నీలో నీవే ఏడవడం

నలుగురిలో ఒకనిగా ఉండక

ఉన్నదంతా కాటికి తోడోస్తాయని భ్రమ కదూ !

ఉండు అలాగే ఉండు

చివరిదాకా అహంకారాన్ని మోస్తూ ఉండు

అది ఎప్పటికీ

నీ అందానికి వికారమే

తెలుసుకొనే సరికి

ఎందరిని వదులుకుంటావో

ఎందరు దూరమవుతారో

కృష్ణ మణి