రంగుల కల

________________కృష్ణ మణి

హోళీ హోళిరే రంగ హోళీ చమ్మకేలిరే అని

రంగుల వనంలో ఆటలాడే హృదయాల గానం హోళీ !

వర్ణ వర్గ వేషం మరచి

స్త్రీ పురుష భేదం తుడిచి  

నిలువెల్ల రంగులు పులుముకొని

ఇంద్రధనుస్సుని భువికి దింపిన వైనం మహాద్భుతం !

చిన్న మనసులు పెద్దవై

పెద్ద వయసులు చిన్నవై

గాయాలను మాన్పే మందు

భాంగ్ పొంగే పాల కడవల మత్తు చిత్రం

దూరాలను తగ్గింఛి మనసు దోచే ఉత్సవ కెరటం !

బురద గుంటలే నవ్వులై

సరసానికి వేదికై

బతుకు గమనంలో ఒక పూట

కాల చక్రంలో సైయ్యాట

వసంతాలపన చేయు ప్రకృతి విరహం ఈ క్షణం !

గోపాలుడి వేణుగానంలో గోపికల పరవశం

ఊరంతా ఊగిపోయే సమయం మధురం కదా

లోకమంతా గులాబి వనమే కదా

అలసిన మనసులు ఊగును కదా  

బరువు తేలికై బంధాలు గట్టిపడే ఆనందపు అలికిడే కదా !

కృష్ణ మణి