గుడ్డి చూపు

__________________కృష్ణ మణి

నడుస్తున్నదెటో అర్ధం కాని గుడ్డి చూపు  

ఏ దిక్కున ఏముందో తెలియదు

కాని ఆగని గమనంలో గతుకులను దాటుతు మెతుకుల వేట !

ఆలోచనలకి రూపం దక్కక ఆరు బయట రాలే ఆకులతో ముచ్చట

చిత్రంగా ఉన్న చింతలో చింత పండు గుర్తుకు వచ్చి

విత్తుల బరువు ఎక్కిరించింది !

బజారులో కూరగాయల రేట్లు నవ్వుతున్నాయి  

వీడు కొనే మొహమా అని !

ఎండిన చెట్టుకింద సంసారం సాగక

మొహం మాడ్చిన ఇల్లాలు

తిని పడేసిన ఐస్క్రీం ఖాళి డబ్బాల పలకరింపుతో

బిక్కుమంటున్న పిల్లల చూపులు !

మనిషి ఆకలిని మోస్తూ

బతుకు చక్రం కింద నలుగుతున్నాడు

రైలు పట్టాలపై అనచబడ్డ రూపాయి బిళ్ళలా !

బయటి ప్రపంచపు పోకడలను అందిపుచ్చు కోక

లోపలి ప్రపంచమే మేలని చెప్పుకొనే

అసహనపు చాందస దోరణిలో సామాన్యుడి వింత దర్పం

బాహర్ శేర్వాని అందర్ పరిశాని అన్నట్లు !

కృష్ణ మణి