మానవ కాకి

మానవ వికృత విలయాన్ని చూసి

లయకారకుడే లబలబమన్నాడు

సిగ్గులేని మానవకాకి శృంగారానికి వరస ఏదైతేనేమన్నాడు

వయసేదైతేనేమన్నాడు

పసి ఆకులను చిదిమేసిన చచ్చువెదవ !

కనికరంలేని కసాయికేది దొరికిన వదలడు

పాపం కళ్ళులేని కత్తికేమి తెలుస్తుంది కోసేది పీకని

శవాల దిబ్బల ధర్మాసుపత్రి

డబ్బులు రాలందే చచ్చిన మనోడు బయటకు రాడు

దాపులేని బతుకుకు రోడ్డే దిక్కైతే

లారీ టైరు కింద ఇస్త్రీ !

ఆకలికడుపున ఆపద్బందువని కొట్టిన జేజేలు

ఓటువేసేటప్పుడు గుర్తుకొచ్చేది వెయ్యినోటు సారసీస

మనోడు ఏమిచేయ్యకపోయినా సరే పక్కకులంవాడు రావొద్దు

గద్దెనెక్కిన గలీజోడు దిగేదాకా పందికొక్కు

మానవత్వం మరచిన మనిషి మరుభూమిలో పురుగు !

కుళ్ళిన లోకంలో కురువని విషం ఎక్కడా ?

కృష్ణ మణి  I 12-05-2014