కోరిక

*****

పుంటికూరలో రొయ్యలను కలిపి తినాలని ఉంది

జొన్న రొట్టేలో పులసచేపను నంజుకోవాలని ఉంది

పోలెల్లో పూర్ణం బదులు బందరు లడ్డు పూతరేకులను పెట్టాలని వుంది

అంబలితో సంకటిని కలిపి మేక మాసంతో లోట్టలేయ్యాలని ఉంది !

అన్నదమ్ములతో కలసి కడలి  తీరానా

ఇసుక తిన్నలపై బొమ్మరిల్లు చేసుకొని ఆడాలని ఉంది

శ్రీకాకుళం అడవిలో జీడి గింజలను ఏరుకోవాలని ఉంది

అరకు కొండల్లో చలి కాచుకోవాలని ఉంది !

రాజమండ్రిలో వేదం చదవాలని ఉంది

కోనసీమ కొబ్బరి నీళ్ళను తాగుతూ

పచ్చని కాంతులను మనసున బందించాలని ఉంది

బెజవాడ అంచున కృష్ణమ్మ నడకలను చూడాలని ఉంది 

కొల్లేటి సరస్సులో వలస పక్షులతో మాటకలపాలని ఉంది !

అహోబిలం అడవిలో ఒంటరినై

వన్యమృగాలతో ఆడుకోవాలని ఉంది

శ్రీహరికోటలో PSLV కి తోడుగా వెళ్ళి

భూగోళాన్ని చేతుల్లో పట్టి ముద్దాడాలని ఉంది

తిరుపతి ఎంకన్న కొండను కాలినడకన వెళ్ళి 

ప్రకృతి అందాలను కాంచాలని ఉంది

కృష్ణ మణి I 18-04-2014