బతకడం
_____________కృష్ణ మణి
ఎదగడం ఎలానో తెలీదు గాని
బతకడానికి కడుపు నిండాలి
చెరువుగట్టుమీద పిట్టకైనా
నడిరోడ్డులో పిచ్చోడికైనా !
లేవమంటారు
పరుగెత్తమంటారు
అందుకోమంటారు
అక్కడెక్కడో గెలుపంటారు !
ఏమో నాకేమి అర్ధం కాని వింతమాటలు
వింత చేతలు
పొద్దునే లేసి చేల్లో నీళ్ళను మలపడం
కలుపుతియ్యడం
కొయ్యడం
కొట్టడం
మొయ్యడం
హమ్మయ్య అంటూ సాయంత్రానికింత సుక్కేసి లోకాన్ని మరచి తనువుకు స్వేచ్చనివ్వడం !
నాకు మీసమెప్పుడొచ్చిందో తెలియదు కానీ
వానలేప్పుడు పడుతాయో
ఎండెప్పుడు మెండుగుంటుందో
చలెప్పుడు వణికిస్తుందో తెలుసు !
జీవించడమంటే ఏంటో తెలియదు
తెలిసిందల్లా బతకడమే
భూతల్లికి సేవ చేస్తూ
బతికున్నంత కాలం !
కృష్ణ మణి
No comments:
Post a Comment