ఉడుకు

note : ఓ మిత్రుడి సంభాషణతో మనస్తాపానికి గురి అయి రాసిన చిన్న కవిత , అన్యదా భావించవద్దు 

ఉడుకు
______________కృష్ణ మణి

దక్కనులో దుక్కులు
అయ్యా మీరు ఎత్తులో ఉన్నారు
మీ పైన పారేనీరు కిందకు దిగుతుంది
మీరు పదెకరాలు పారిస్తే 
కింద మూడొందల ఎకరాలు పారించోచ్చు
ధాన్య ఉత్పత్తి కావాలి
మీ చావులు అక్కరలేదు కేంద్రానికి
అని పలికిన మిత్రుడి అహంకారం

మా చావులు మీకక్కరలేదా ?
ధాన్య లాభం కేంద్రానికా ?
లేక మీ కోటలకా ?

కరెంటుతో నీటిని ఎత్తి ప్లోరైడ్ ను కడగొచ్చు
గతిలేని కాడ మీకు కరెంటు నీళ్లాని కుంటి నవ్వులా ?

ఇదే కదా దశాబ్దాలుగా మా వెతలు
ఇదే కదా చావలేని తనాన దుబాయి నడకలు
ఇదే కదా చచ్చి రగల్చిన బొగ్గుల కొలిమిలో పత్తి గింజలు !

మీరు మీరే
మీది మీదే
మాది మీదేనా ?

ఆగని కన్నుల దారల వాగులో ఆటలాడే తుంటరులు
మా ఉద్యమం సరైనదే అంటారు
మరి అంత ఉలుకెందుకు ?
ఉడుకెందుకు ?

పగిలింది మోసపు అద్దం
పోయింది గ్రహచారం 
అయినా చింత చచ్చిన పులుపు చావని వైనం !

మానవత్వం లేని మనసుల మంచి కోరే మిత్రులం
పొందిన విజయానికి మా చిరుమందహాసాలు
మీకు వికటాట్టహాసాలనిపిస్తే
అది మా తప్పు కాదు
అనగని మీ అహంకారానికి సూచకం

కృష్ణ మణి 18-05-2014