దేవుడా

______________________కృష్ణ మణి

ఏమిరా దేవుడా

నరకాన్ని పెంచినవు

స్వర్గమెక్కడ దాషినవు ?

నువున్నావో లేవో తెల్వదు కాని

ఆడుండని ఈడున్నడని

రాతి బొమ్మలో అన్నడని

కాదు దర్గాలో చెద్దరు కిందని

కాదు  జీసస్ క్రాసులో అని !

ఇంతకీ నువ్వెకడరా తండ్రి ?

మనషుల ముంగల రావు

ఏది నిజమో చెప్పవు

పరెషాన్ చేస్తున్నవ్ పాగల్ గాళ్ళను !

ఎవరిని నమ్మాలే ?

ఏ తొవ్వల పోవాలె ?

అసలు ఎక్కడికి పోవాలె ?

ఆది అంతం లేనోడివంట

రంగు రూపం లేదంట !

పుట్టించినవు నడిపిస్తున్నవు సంపెస్తున్నవు

ఏం ఆటలా ?

నువ్వేమన్న పచ్చీసు అడుతున్నవా ?

లేక చెస్సు ఆటనా ?  

జంతులకు లేని బేదాలు మనషులకేందుకో ?

అవింక నయం ఆకలి పోరు తప్ప అంకారం లేదు

ఒకనికోకనికి పడకుండా జేస్తున్నవు

ఎవరిని గెలిపించనీకే ?

ఎవనిమీద కోపం ?

బయటికొచ్చి బాజాప్త జెప్పు ?  

కృష్ణ మణి I 11-06-2014