నగ్నంగా ఒక పక్షి
_________________కృష్ణ మణి
నిజం చెప్పనా
నాకెందుకో పుట్టినప్పటిలా
నగ్నంగా దోర్లాలని ఉంది
నింగికెగిసే పక్షిలా మారాలని ఉంది !
ఎవరో బట్టకట్టారు
ఎవరో కట్టుబాట్లు నేర్పారు
సమాజం అన్నారు
సమాజం మరో సమాజంతో యుద్ధం అన్నారు !
దేవుడన్నారు
దయ్యమన్నారు
మతమన్నారు
ఒకరిని మొక్కుతే
మరొకరిని అసహ్యించుకోమన్నారు !
దేశమన్నారు
దోపిడన్నారు
ఒకరి పై ఒకరు ఎప్పుడూ కత్తులు దూయమన్నారు !
కష్టమన్నారు
నష్టమన్నారు
ఇష్టమయితే ఉండమన్నారు
లేకుంటే సన్నాసన్నారు !
బుర్ఖా అన్నారు
ముసుగన్నారు
తల వంచమన్నారు
లేకుంటే కులతన్నారు !
భాషన్నారు
వేషమన్నారు
అలా అయితేనే మనిషన్నారు
కాదంటే పిచ్చోడన్నారు !
అందుకే వీరికి దూరంగా
నగ్నంగా దోర్లాలని ఉంది
నింగికెగిసే పక్షిలా మారాలని ఉంది !
కృష్ణ మణి
No comments:
Post a Comment