నేనో వింత

________________________కృష్ణ మణి

ఒకనాడు అడవి ప్రపంచంలో అందరిలా ఒకన్ని

ఆకలిపోరాటంలో విసిరిన రాయి ఇంకో రాయిని ముద్దాడి

అగ్గిని కన్న క్షణాన మెరిసిందేదో నా మెదడున

కాలిన కళేబరాల రుచి బాగుందని మల్లి మల్లి తినాలని ఆరాటం !

ఆ అగ్గి కోసమే కదా ఎన్నో యుద్దాలు చేశాను

చరిత్ర రాయని కాలాన దాగిన వీర గాధలెన్నో

యుగాలు గడిచేకొద్దీ ఎన్నో వింతలు సృష్టించి వింతగా మారిపోయా !

కమ్మరి కొలిమి నుండి కర్మాగారం దాక

కాగడ దివిటి మొదలుకొని LED బుల్బు దాక

గుడ్డకట్టని గుడిసె ఎరుగని గుహల బతుకు నుండి

గుడ్డలిప్పుకొని తీరాన సేద తీరు దాక !

ఈ ఇంగలం కోసమే కదా ఇంధనం వేట  

భూమిని తోడాను సంద్రం తోడాను అతి తెలివితో ఓజోనును కూడ  

వేటకు అడ్డు అదుపు లేదు సకల జగత్తును చరబట్టిన మేధావిని !

నీరు బొగ్గు పెట్రోల్ గాలి సూర్యకాంతి వస్తువులై బతుకు ఇస్తరులై

నవ నాగరిక ప్రపంచాన్ని మూల శక్తులై నడిపే ఇంధనాలు

మస్తిష్కం ముదిరి మతిలేని ముచ్చు మనసు నాది

చంద్రునిపై ఉంటానని ఉరుకులాట గ్రహాలపై జీవశక్తికై వెతుకులాట  !

అమ్మ ఒడిలో పాలధారాలతో పైత్యం ఎక్కిన అమాయక శిశువును

పచ్చని వనాన్ని పసందుగా తిని ఎడారిగా పిప్పి చేసిన రక్కసుడను !

కృష్ణ మణి I 10-10-2014