ఆధారం

_______________కృష్ణ మణి

ఆమె పాదాలు అటుగా వెళుతున్నాయి

నా ప్రాణాలు ఇటుగా పోతున్నాయి

ఆ మెత్తటి పాదాలు నాకు దూరంగా జరిగే కొద్ది

హృదయంపై కొండ వొరిగినట్లు తెలియని బరువు !

ఈ బరువు తాత్కాలికమైన

ఎందుకో భరించలేక పోతున్నాను

మబ్బుల్ని మోస్తున్న చిట్టి చినుకులా !

ఆమె నాలో సగం

సాగుతున్న పడవకు ఒక తెడ్డులా

కడలి నడకన దిశను మార్చే చుక్కానిలా !

తల్లిదండ్రులు రూపం ఇచ్చారు

వారిలో ఒకనిగా చోటిచ్చారు

ఆమెను తోడిచ్చారు

ఆమె నా రూపానికి ప్రతిరూపానిచ్చింది !

మోడువారుతున్న మోద్దుకు

లతలా అల్లుకొని పునఃజీవితాన్నిచ్చి

ఇంట్లో గల గలమనే గజ్జెల సవ్వడికి ఆధారమై

పిల్లలు నేనే తనకు ఆధారం అంటుంది అమాయకంగా

మా అందరికి అడిగిందే తడువుగా ప్రేమను పంచుతూ !

కృష్ణ మణి