చివరి కొడుకు
_______________కృష్ణ మణి
వీడు
ఏ ధర్మాన్ని ఆచరించాలో చెప్పు
ఏ బట్టకట్టాలో
ఎలాంటి తిండి తినాలో
అదీ ... ఎలా తినాలో చెప్పు
సమాజంలో ఇప్పుడు వీడు
ఒక ఆనాదలా కంటతడి పెడుతున్నాడు
వాడు రాలుతున్నాడు
కరెంటు తీగలపై ఒంటరి పిట్టలా !
మనషుల మధ్య మమతల కోసం వాడు
గుండె మండి గుడి గంట కొడుతున్నాడు
దర్గా మెట్లెక్కి ‘’యా అల్లా’’ అంటున్నాడు
చర్చికెళ్ళి రోదిస్తున్నాడు ‘’జీసస్’’ అని
వాడిప్పుడు పరాయివాడు
ఎవడూ మావాడనరు వాన్ని
వాని కళ్ళలోకి చూస్తే
మన మనసు పెద్దగా దర్శనమిస్తుంది
వాణి మాటల్లో ప్రేమ ఒలుకుతుంది
వాడు
పరిగెడుతున్నాడు
ఒలంపిక్ కాగడలా చేతిలో దివిటిని చేతబూని
మనం మనుషలమని
మనలోని అందకారాన్ని తరిమేద్దామని
మానవత్వానికి చివరి కొడుకు వాడు
వాడు చస్తే లోకం చచ్చినట్లే
అప్పుడు
మనిషిని బూతద్దం పట్టి వెతకాలి
అప్పుడు
మనిషిని బూతద్దం పట్టి వెతకాలి
కృష్ణ మణి
No comments:
Post a Comment