దారి

దారి

_______________కృష్ణ మణి

మౌనం ప్రశాంతతకు నిదర్శనం

అని తెలుసు కాని

మెల్లిగా అర్ధమౌతుంది

ఆవేశాన్ని దిగమింగి సాగుతున్న ఆలోచనని

ఎగసే అలకు సూచనని

మరుగుతున్న నెత్తురు సెగని

జరిగే పోరుకు సిద్దమని

మౌనం పెకిలితే

ఉద్భవించే శబ్దాన్ని

కలియబడే ఉగ్రరూపాన్ని

తట్టుకొనే ధైర్యం ఎక్కడిది ?

నిట్టూర్పుల వలలోంచి జారి

సంద్రంలో దూకిన ఉద్వేగాన్ని ఆపే శక్తి ఎక్కడిది

మిత్రమా

చూడు నిదానంగా నీలోకి

ఎక్కడో ఆరిన కసిని

ఒక్కసారి కుదిపిచూడు

ఏమంటుందో

ఇంకెంతకాలం ఇలా అని

తడబడుతున్న నీ అడుగులను నిలదీస్తున్నది

అలా కాదు ఇలా అని

దారి కనిపించేలా

నీలో దిశా నిర్దేశం జరుగుతుంది

విన్నావా

కనిపించిందా

మరి పదా ఆ దారిలో

నీకు నువ్వే గురువై

గురివైపు పరుగుపెట్టు

నలుగురు నడిచే దారికి

నువ్వే దారివై

కృష్ణ మణి