విందు

విందు
___________ క్రిష్ణ మణి

నన్నో తీపిరుచి వెంటాడుతుంది
చిలిపిగా సాగిన పసిప్రాయం
మళ్లీ అందని మధురం

అప్పుడు తెలియదు
గడుస్తున్న సమయం తిరిగిరాదని
కరిగిన పాలపళ్ళ నవ్వుల కర్పూర హారం

నా వెంట నడిచే ఙాపకాల బాణాలు
ఏకాంతంలో గిలిగింతలు పెడుతుంటాయి

వెన్నల్లో పాటలు
చెరువుగట్టుపై ఆటలు
స్కూలు గ్రౌండ్‌లో పరుగులు
చీకట్లో భయపడి నిద్రలో అరుపులు
ప్రేమనొంపే అమ్మ గోరుముద్దల గారాబాలు
ఒకరినొకరు గేలి చేసుకొన్న అల్లరి గోలల స్నేహాలు

తడి ఆరని తేనెపట్టు గదులు
అక్కడ ఎంతైనా దాచుకోవచ్చు
చివరి రోజుల్లో కాలక్షేపానికి పనికొచ్చే పసందైన విందు

క్రిష్ణ మణి