స్పష్టం
______________కృష్ణ మణి
పడుతుంది కష్టంగా అడుగు
అయినా చుట్టూ నా అస్తిత్వ పునాదులే
నన్ను మేలుకొలుపుతున్నాయి అడగడుగున !
ఇప్పుడు
ముస్తాబైన కుండలు
గండ దీపాలు
ఎందుకో కొత్తగా అనిపిస్తున్నాయి
అదెదో నేను మల్లీ పుట్టినట్లు !
నవాబుల కోటలో
అమ్మవారి జాతర
మరచిన చిన్నతనాన్ని తిరిగి పొందాను
చీకటిని దాటి వెలుగునీడను చేరినట్లు !
వేప మండల ఊపుడు
పసుపు భండారి నొసల్లు
నిమ్మకాయల దండలు
ఊగిపోవాలనే ఉత్సాహం
ఆగని ఉద్వేగం
తీన్మార్ దరువు
లయబద్దంగా డోలు తాళం !
చర్లకోలల వీరంగం
శూలాల మెరుపు
కాలి గజ్జెల గలగలలు
ఆశీర్వచన హస్తాలు
నన్ను నేను కొత్తగ చూసుకున్నట్లు
నా చుట్టేదో వైభవం జరుగుతున్నట్లు !
ఎంత బాగుందో
నేల దుమ్ము నింగికంటే ఊపు నాదనే నిజం స్పష్టమైంది
గుడ్డివానికి ఇప్పుడే చూపోచ్చి తల్లిని
గుర్తుపట్టినట్లు !
కృష్ణ మణి
No comments:
Post a Comment