వెన్నెల-వెలుగు

________________కృష్ణ మణి

పెదవంచున మెరిసిన వెలుగు

రవికాంచని మనసున కురిసిన వెన్నెల

ఆ వెలుగు వెన్నెల జాతర ఉండునా కలకాలం అని అడిగిన కన్నులు

అవునని కొందరి ఆలోచన

కాదని ఇంకొందరి వాదన

ఇంతకీ ఎవరి దారి ఏది ఆగని గోదారి నడకన ?

మోహంతో శాంతిని వెతికే సంసారులకు ఒక దారి

ఏకాంతంలో మోక్షం పొందే సన్యాసులకు మరో దారి

వింత దారుల్లో వెనక ముందు పరుగుల గమ్యం !

నయనానంద దృశ్యం మనసున మల్లెలు కురిపిస్తే

కళ్ళు మూసుకొని ఆనందం అంచున ఆడే ఆరాటం ఒక వింత అనుభవం

తడబడు అడుగుల గమనంలో అందక పొందక అహంకారమే అలంకరణ !

వీధి వీధి భాగోతాల అంతర్మధనంలో విహరించే వెర్రి నవ్వుల కన్నా

తల్లిని గుర్తెరిగి చిదానంద చిద్విలాస జాతర చిరుకాలమైన మిన్నేగా !