ఎక్కడ నా తల్లి

ఎక్కడ నా తల్లి

_______________ కృష్ణ మణి

ఎదురొచ్చిన గుంతను ముద్దాడిన నొసలుకు

భూతల్లి దీవనల దుమ్ము

కనుపాప చూసింది

కొండలా నిలుచున్న మట్టి ముద్దలను

అ మట్టి ముద్దల నడుమ ఉదయించిన సూరిడల్లె

పరుగున వస్తున్న బిచ్చగత్తె

అయ్యో నాయనా ఎంత పనయ్యిందని భుజం తట్టి లేపి

ఒళ్లో దాచుకుంది తలను

అప్పుడు మా అమ్మే గుర్తొచ్చింది

తల కార్చిన రక్తం కన్నా

నా మనసు కార్చిన కన్నీరే ఎక్కువ

కళ్ళు తెలిచే సరికి ఏసీ గదిలో ఉన్నాను

ఆ తల్లి ఎక్కడని చూసాను

అయస్కాంతానికి నిలుచున ఇనుప రజనులా నా వాళ్ళు

వెళ్లి వెళ్లి ఆ గుడిసెల ముందే కూలావేందిరాని

ఏటకారపు పలకరింపులు

చెంపలు వాయించాలనే కసి

కాని

ఏం చెయ్యను

రెండు చేతులకు ఫ్రాక్చర్ పట్టీలు

ఆమెను చాలాసార్లు వెతికాను అక్కడ  

ఇప్పుడు ఆవిడ అందరిలో కనిపిస్తుంది

చిరునవ్వులతో దీవనలిస్తూ

కృష్ణ మణి